Policia e Kosovës në Gjakovë ka nisur hetimet për dëmtimin e një kopjeje të Kuranit, të gjetur në zonën e Çabratit. Ngjarja raportohet të ketë ndodhur më 27 janar 2026.
Zëdhënësja e Policisë për rajonin e Gjakovës, Vlera Krasniqi, deklaroi se nuk dihet ende autori i veprimit apo qëllimi i tij. “Sot, në zonën e Çabratit në Gjakovë, është gjetur një libër fetar i dëmtuar. Aktualisht nuk dihet se kush e ka kryer këtë veprim dhe as cili ka qenë qëllimi”, tha ajo.
Policia ka njoftuar prokurorin e Prokurorisë speciale dhe po ndërmerr veprimet e nevojshme për sqarimin e rrethanave. Hetimet zhvillohen në bashkëpunim me Prokurorinë.
Disa media e kanë përshkruar ngjarjen si djegie të Kuranit, ndërsa Policia e konfirmon si dëmtim. Nuk ka detaje të tjera për autorët ose motivin.