Gjatë kontrolleve të ushtruara në akset kryesore dhe zonat me frekuentim të lartë të kryeqytetit, Policia Rrugore e Tiranës ka evidentuar një numër të lartë shkeljesh të Kodit Rrugor. Aksioni është përqendruar në parandalimin e aksidenteve, ndëshkimin e drejtuesve që shkaktojnë zhurma përmes modifikimeve, atyre që tejkalojnë shpejtësinë, si dhe atyre që drejtojnë mjetin nën efektin e alkoolit.
Nga bilanci zyrtar i bërë publik, masat administrative të vendosura ndahen si më poshtë:
• 4 998 masa për shkelje të sigurisë rrugore;
• 7 868 masa për shkelje të rregullave të ndalimit, pushimit dhe qëndrimit;
• 1 093 masa për drejtuesit e motomjeteve që nuk kanë përdorur kaskën mbrojtëse;
• 418 masa për mosvendosje të rripit të sigurimit;
• 309 masa për përdorim të celularit gjatë drejtimit të mjetit;
• 83 masa për automjete me modifikime të paligjshme që krijojnë zhurma;
• 19 ndëshkime për drejtim mjeti në gjendje të dehur.
Policia ka bllokuar gjithsej 75 mjete gjatë kësaj periudhe. Autoritetet kanë përsëritur apelin ndaj drejtuesve të mjeteve për respektimin rigoroz të rregullave, shmangien e alkoolit në timon dhe posedimin e dokumentacionit të rregullt, me qëllim garantimin e parametrave të sigurisë në rrugë.