Hetuesit policorë nga Stacioni Policor në Novobërdë, në bashkëpunim me Prokurorinë e Shtetit, kanë mbyllur hetimet lidhur me raportimin për vjedhjen e një automjeti në fshatin Kufcë e Epërme. Pas veprimeve intensive operative në terren, është konstatuar se rasti nuk paraqet elemente të veprës penale “Vjedhje e rëndë”.
Sipas njoftimit zyrtar, nga verifikimet dhe intervistat e zhvilluara, u vërtetua se vetura e tipit Audi me targa vendore ishte marrë në shfrytëzim nga një familjar i ankueses. Raportimi në polici rezultoi se kishte ndodhur për shkak të mungesës së informacionit të plotë nga ana e saj mbi vendndodhjen dhe përdorimin e automjetit në atë periudhë.
Policia theksoi se gjatë procesit hetimor janë sqaruar të gjitha rrethanat përkatëse që çuan deri te raportimi i këtij rasti.