Drejtoria Vendore e Policisë Tiranë ka reaguar në lidhje me shoqërimin e një të mituri në Komisariatin e Policisë Nr. 1 gjatë protestës së opozitës më 24-25 janar 2026.
Sipas sqarimit zyrtar, i mituri Romeo Kora, 14 vjeç, u konstatua duke gjuajtur me gurë dhe sende të forta drejt shërbimeve të policisë gjatë veprimeve për parandalimin e sjelljeve të rrezikshme në tubim. Për këtë arsye, ai u shoqërua për verifikim.
Policia thekson se i mituri nuk u mbajt në asnjë moment në ambiente të përbashkëta me persona të rritur të ndaluar apo të shoqëruar. Ai qëndroi në një ambient të përshtatshëm, u trajtua me kujdes në përputhje me parimet dhe garancitë ligjore për të miturit dhe u la i lirë menjëherë pas mbërritjes së përfaqësuesit ligjor.
Në lidhje me veprimet e punonjësve të policisë, u njoftua menjëherë Drejtoria e Standardeve Profesionale në Drejtorinë e Përgjithshme të Policisë së Shtetit, si dhe Agjencia e Mbikëqyrjes Policore, për verifikimin e plotë të rastit.
Ngjarja shkaktoi reagime nga opozita, e cila denoncoi arrestimin e të miturit dhe mbërriti në komisariat, ku u vunë re tensione mes deputetëve dhe policisë. Në vend mbërriti gjithashtu përfaqësuesi i Avokatit të Popullit për verifikim.
Protesta e së shtunës u shoqërua me tensione, me hedhje molotovësh dhe fishekzjarresh drejt godinave të Kryeministrisë dhe Kuvendit. Deri më tani janë shoqëruar 23 protestues.