Policia e Kosovës ka realizuar një operacion të koordinuar më 19 maj 2026 në fshatin Rakaj të Ferizajt. Operacioni u zhvillua nga Policia Kufitare Jugu pas pranimit të informatës nga Stacioni Policor i Ferizajt.
Gjatë kontrollit në pronën e të dyshuarit me inicialet L. K. dhe në dy lokacione të tjera u zbuluan gjithsej 108 krerë dele. Nga këto, 100 krerë nuk kishin numra matrikuli dhe asnjë dokumentacion që dëshmon origjinën apo kontrollin veterinar.
Inspektorët e Agjencisë së Ushqimit dhe Veterinarisë nuk gjetën shkelje ligjore në dy lokacionet e tjera të kontrolluara. Me urdhër të prokurorit të Shtetit, rasti u trajtua si kundërvajtje doganore dhe iu dorëzua Doganës së Kosovës në Han të Elezit për procedim të mëtejshëm.
Hetimet vazhdojnë në koordinim me organet kompetente.