Klubi i Bylisit ka njoftuar se ka humbur shërbimet e portierit Ion Kristian Gurau për pjesën e mbetur të sezonit.
Futbollisti, i afruar gjatë merkatos së janarit për të zëvendësuar Zheremi Vashu – i cili u largua nga ekipi pas protestës publike ku braktisi fushën –, ka pësuar një aksident pasditen e 28 janarit 2026. Ai u dëmtua në dorë me xham, duke prekur një nga damarët.
Menjëherë i është dhënë ndihma e parë dhe klubi është angazhuar për ekzaminime të specializuara. Periudha e riaftësimit parashikohet të zgjasë 4-5 muaj, duke e detyruar portierin të mbyllë sezonin para kohe.
Në njoftimin zyrtar, FK Bylis shprehet se i gjendet pranë lojtarit dhe i dëshiron shërim të shpejtë si dhe kthim sa më të shpejtë në fushë.
Përditësime
Ion Kristian Gurau, portieri 26-vjeçar i Bylisit, u nënshtrua sot një ndërhyrjeje kirurgjikale. Foto të publikuara tregojnë duart e tij në allçi dhe të fashuara. Gurau ka luajtur vetëm 3 ndeshje këtë sezon: humbje ndaj Tiranës dhe Flamurtarit, si dhe 1 pikë ndaj Egnatias.