SC Gjilani dhe FC Prishtina kanë arritur marrëveshje për huazimin e portierit Agron Kolaj. 24-vjeçari do ta vazhdojë pjesën e mbetur të sezonit te skuadra nga Gjilani, ku vjen si përforcim pas mbetjes si portier i dytë te Prishtina, pas Altin Gjokajt.
Në njoftimin zyrtar, SC Gjilani thekson se Kolaj vjen nga kryeqyteti si vlerë e shtuar për ekipin në pjesën e dytë kampionale. Ai më parë ka mbrojtur ngjyrat e Besës nga Peja, ku debutoi në elitën e futbollit kosovar. Pas transferimit te Prishtina, ka arritur 54 paraqitje zyrtare në kampionat.
SC Gjilani i ka uruar mirëseardhje Agron Kolajt dhe shpreh besimin se kontributi i tij do të jetë i rëndësishëm për skuadrën në vazhdim të sezonit. Gjilani e nis stinorin pranveror nga vendi i gjashtë me 26 pikë në elitën e futbollit të Kosovës.