Klubi i futbollit SC Gjilani ka njoftuar zyrtarisht arritjen e marrëveshjes me portierin Marijan Çoriç për sezonin e ri. Lojtari, i cili më parë ishte pjesë e skuadrës së Llapit, është bashkuar zyrtarisht me ekipin gjilanas.
Sipas komunikatës së klubit, Çoriç ka nënshkruar një kontratë të vlefshme deri në vitin 2028. Drejtuesit e SC Gjilanit kanë vlerësuar cilësitë, përvojën dhe mentalitetin e lojtarit, duke theksuar se qëllimi i këtij transferimi është rritja e konkurrencës në repartin e portës dhe realizimi i objektivave për sezonin në vijim.
Klubi i ka uruar mirëseardhje portierit dhe ka shprehur besimin se kontributi i tij do të jetë thelbësor për ecurinë e ekipit me fanellën kuqe e bardhë, duke kërkuar gjithashtu mbështetjen e tifozëve.