Një situatë e pazakontë është regjistruar në futbollin kosovar, ku dy klube të elitës kanë zyrtarizuar të njëjtin futbollist brenda një harku kohor shumë të shkurtër.
SC Gjilani njoftoi fillimisht afrimin e sulmuesit Bleart Tolaj, duke pohuar se ai kishte nënshkruar pas përfundimit të sezonit dhe se do të ishte pjesë e projektit të tyre për sezonin e ardhshëm. Prezantimi u shoqërua me imazhe ku lojtari shfaqej i veshur me fanellën e këtij klubi.
Megjithatë, pak çaste më pas, FC Ballkani doli me një komunikatë zyrtare ku konfirmoi vazhdimësinë e bashkëpunimit me Tolajn. Sipas klubit nga Suhareka, futbollisti ka rinovuar kontratën për dy vite të tjera, duke theksuar se ai mbetet pjesë e rëndësishme e planeve dhe objektivave të tyre sportive. Deri më tani, asnjëra nga palët nuk ka ofruar sqarime shtesë për këtë mospërputhje, ndërsa çështja mbetet për t'u sqaruar në ditët në vijim.
Përditësime
Në një zhvillim të pazakontë në Superligë, futbollisti nga Deçani, Bleart Tolaj (26 vjeç), po tërheq vëmendje me paraqitjet e tij. Sipas portalit Transfermarkt, vlera e tij aktuale e tregut është 600 mijë euro. Më herët, Tolaj ka fituar titullin kampion me FC Ballkani nën drejtimin e trajnerit Ilir Daja.