Pas disa ditësh polemikash, futbollisti Bleart Tolaj ka reaguar publikisht për të sqaruar të ardhmen e tij profesionale. Konfuzioni kishte nisur pasi Gjilani e prezantoi atë si përforcim të ri, ndërkohë që Ballkani njoftoi se kishte vazhduar kontratën me lojtarin.
Përmes një deklarate, Tolaj ka bërë të ditur se është zyrtarisht futbollist i Gjilanit, duke shprehur përkushtim për këtë fazë të re të karrierës së tij. Ai ka marrë përgjegjësinë për situatën e krijuar, duke kërkuar falje për paqartësitë ndaj opinionit sportiv.
Sipas marrëveshjes së arritur me mirëkuptimin e të dy klubeve, Tolaj do të angazhohet me Ballkanin për dy ndeshjet e radhës në Conference League. Pas këtij angazhimi, ai do t'i bashkohet përfundimisht skuadrës së Gjilanit. Futbollisti ka shprehur mirënjohje ndaj drejtuesve, stafit, bashkëlojtarëve dhe tifozëve të Ballkanit për mirëkuptimin dhe korrektësinë e treguar në zgjidhjen e kësaj çështjeje.