Qytetarët në Maqedoninë e Veriut do të mund të përdorin në telefon letërnjoftimin dhe patentë-shoferin, pasi përdorimi zyrtar i portofolit elektronik nis të enjten. Aplikacioni do të prezantohet të mërkurën, më 28 tetor. Këtë e njoftoi ministri i Transformimit Digjital, Stefan Andonovski, para një panel-diskutimi për digjitalizimin e sektorit privat në Shkup.
Sipas ministrit, aplikacioni do t’u mundësojë përdoruesve të zgjedhin cilat të dhëna personale të ndajnë, në vend që të shfaqin të gjithë informacionin që përmbajnë dokumentet fizike. Kjo mund të përdoret, për shembull, gjatë identifikimit në bankë, bar apo në një ambient tjetër.
Të dhënat do të ndahen përmes një kodi QR të krijuar për përdorim të vetëm. Personi tjetër do t’i marrë ato vetëm nëse përdoruesi jep leje. Kodi skadon pas 10 deri në 15 sekondash dhe nuk mund të përdoret përsëri. Andonovski tha se aplikacionit dhe sigurisë së të dhënave personale u është kushtuar vëmendje e veçantë.
Sipas Portalb.mk, përdoruesit do të mund të kyçen në aplikacion përmes llogarisë së tyre në Portalin Kombëtar për Shërbime Elektronike, uslugi.gov.mk, ku do të kenë qasje në të dhënat dhe funksionet e aplikacionit.
Andonovski e përshkroi portofolin elektronik si fillimin e një procesi drejt portofolit digjital evropian dhe digjitalizimit më të gjerë të dokumenteve. Ai tha se pritet që, me zhvillimin e aplikacionit, të shtohen shërbime, mundësi dhe dokumente të tjera për qytetarët. Deklaratat u bënë para panelit “Parakushtet dhe sfidat për digjitalizimin e përshpejtuar të sektorit privat”, të mbajtur në hapësirat e INOFEIT EDIH në Shkup.