Zëdhënësja e Qeverisë, Venera Latifi Azizi, njoftoi se përdorimi i aplikacionit mobil m.Shërbime pritet të nisë së shpejti. Aplikacioni synon të lehtësojë qasjen e qytetarëve në shërbimet publike dhe të përshpejtojë proceset administrative përmes digjitalizimit.
Në versionin fillestar, aplikacioni do t’u mundësojë qytetarëve të kenë letërnjoftimin dhe patentën e shoferit në formë elektronike përmes telefonit mobil. Ai do të ofrojë gjithashtu qasje në tri shërbime elektronike.
Aplikacioni do të jetë falas dhe do të mund të shkarkohet përmes Google Play dhe App Store. Qytetarët do të mund të kyçen duke përdorur llogarinë e tyre në portalin kombëtar për shërbime elektronike, uslugi.gov.mk, tha Azizi.
Sipas zëdhënëses, projekti është pjesë e përpjekjeve të Qeverisë për modernizimin e shërbimeve publike dhe krijimin e një komunikimi më të lehtë, më të shpejtë dhe më efikas ndërmjet qytetarëve dhe institucioneve.
Përdorimi i aplikacionit do të jetë vullnetar, ndërsa dokumentet fizike do të vazhdojnë të jenë në përdorim. Azizi tha se aplikacioni do të shërbejë si një mundësi shtesë dhe praktike për qasje në dokumentet personale.
Projekti synon që shërbimet publike digjitale të jenë më të qasshme për qytetarët dhe të zhvillohen në përputhje me standardet evropiane.