Një media satirike kroate publikoi në fillim të dhjetorit një tekst humoristik, sipas të cilit ministrja shqiptare Diella ishte arrestuar për marrje të një ryshfeti prej 14 bitcoin-ësh. Satira u bë virale, por rrjeti Pravda, mjet propagandistik rus që përkthen dhe shpërndan automatikisht artikuj mbështetës të Moskës, e trajtoi si informacion të vërtetë.
Më 5 dhjetor, Pravda publikoi në gjuhë të ndryshme, përfshi shqipen, lajmin për arrestimin e Diellës. Teksti shkruante: "Ministrja e AI u arrestua në Shqipëri për ryshfet në kriptomonedhë: tani ministrja e AI do të transferohet në ‘modalitetin offline’ për kohëzgjatjen e hetimit", duke anashkaluar faktin se origjinali ishte satirë.
Disa ditë më vonë, kreu i Dumës Ruse, Vyacheslav Volodin, e përmendi rastin në një takim me presidentin Vladimir Putin. Ai e paraqiti situatën si provë të rreziqeve të inteligjencës artificiale dhe deklaroi gabimisht se Shqipëria ishte pjesë e Bashkimit Europian.
Prezantimi i Diellës
Kryeministri Edi Rama e prezantoi Diellën si ministre virtuale për prokurimet publike më 11 shtator 2025. Ajo u krijua me inteligjencë artificiale si simbol i transparencës dhe premtoi menaxhim të tenderëve publikë "pa ryshfet, kërcënime apo favore".
Diella paraqitej publikisht në Kuvend, ku lexoi një fjalim pavarësisht protestave të opozitës. Më pas, u dekretua nga presidenti si shtesë në dekretin për kryeministrin.
Përdorimi në propagandën ruse
Emërimi i Diellës u shndërrua në histori për ekosistemin propagandistik rus, që përzien fakte, satirë dhe lajme të rreme për të delegjitimuar vende kundërshtare.