Shkëlqim Hajdari, prefekt i Qarkut Tiranë, mori pjesë këtë të enjte, më 26 shkurt 2026, në seancën e Këshillit Bashkiak Tiranë, në zbatim të Rregullores së Këshillit Bashkiak. Ai zhvilloi takime paraprake me kryetaren e këtij këshilli, Megi Fino, dhe nënkryetarin e opozitës, Dorian Teliti, ku dëgjoi me vëmendje vërejtjet dhe sugjerimet e tyre për përmirësimin e mbarëvajtjes së punimeve.
Në një postim në rrjetet sociale, Hajdari vlerësoi atmosferën e seancës dhe theksoi rëndësinë e dialogut institucional. Postimi i tij i plotë është si vijon:
"Pas takimeve paraprake me Kryetaren e Këshillit Bashkiak, znj. Megi Fino, si edhe me nënkryetarin e opozitës, z. Dorian Teliti, ku dëgjova me vëmendje vërejtjet dhe sugjerimet për mbarëvajtjen e punimeve, ndoqa sot seancën e Këshillit Bashkiak, në zbatim të Rregullores së Këshillit Bashkiak.
Seanca u zhvillua përgjithësisht në një klimë normale debati, duke respektuar në thelb procedurat ligjore dhe rregulloren përkatëse. Dialogu institucional dhe respektimi i rregullave janë themel për funksionimin e shëndetshëm të organeve vendimmarrëse dhe për shërbimin ndaj qytetarëve.
Si Prefekt i Qarkut Tiranë, do të vijoj të ushtroj me përgjegjësi rolin kushtetues të mbikëqyrjes së ligjshmërisë, në funksion të transparencës, bashkëpunimit dhe interesit publik."
Hajdari theksoi se do të vazhdojë të ushtrojë me përgjegjësi rolin e tij në mbikëqyrjen e ligjshmërisë, për transparencë dhe interes publik.