Presidenti i Republikës, Bajram Begaj, zhvilloi më 3 mars një takim me akademikë nga Shqipëria dhe Kosova. Në takim morën pjesë Justina Shiroka Pula, kryetare e Akademisë së Shkencave dhe Arteve të Kosovës, Skënder Gjinushi, kryetar i Akademisë së Shkencave të Shqipërisë, si dhe akademikë të tjerë nga të dyja vendet.
Kreu i Shtetit i përgëzoi kryetarët e akademive për bashkëpunimin e deritanishëm në projekte që nxisin promovimin e elementëve identitarë kombëtarë dhe adresimin e problemeve bashkëkohore shoqërore.
Në mënyrë të veçantë, Presidenti Begaj shprehu përgëzime për projektin më të madh të dy akademive dhe instituteve albanologjike: Enciklopedinë e shqiptarëve.
Ai vlerësoi se akademikët luajnë rol thelbësor në ruajtjen dhe promovimin e identitetit kombëtar dhe atij gjuhësor shqiptar.
Presidenti Begaj çmoi temat e konferencave të fundme të përbashkëta të organizuara nga dy akademitë, veçanërisht ato të demografisë, si tema me rëndësi për sigurinë kombëtare.
Kreu i Shtetit garantoi akademikët se do të kenë gjithmonë mbështetjen e tij si president dhe të institucioneve shqiptare për çdo projekt që synon promovimin e historisë kombëtare përmes fakteve dhe të vërtetave shkencore.