Presidentja e Kosovës, Justina Shiroka-Pula, i ka përcjellë një mesazh urimi Akademisë së Shkencave të Shqipërisë me rastin e shënimit të 54-vjetorit të themelimit të saj. Në këtë komunikim, ajo ka vlerësuar kontributin e vazhdueshëm të këtij institucioni në fushën e dijes, kërkimit shkencor dhe mbrojtjes së trashëgimisë kombëtare.
Në mesazhin e saj, Shiroka-Pula ka vënë në pah historikun e institucionit, duke përmendur themelimin dhe drejtimin e parë nga profesor Aleks Buda, si dhe udhëheqjen aktuale nga Skënder Gjinushi. Presidentja vlerësoi se, gjatë pesë dekadave e gjysmë të veprimtarisë së saj, Akademia e Shkencave është konsoliduar si një ndër shtyllat kryesore të identitetit intelektual shqiptar. Ajo nënvizoi se institucioni ka arritur të ndërthurë me sukses ruajtjen e trashëgimisë me zhvillimet në shkencë, inovacion dhe zhvillim të qëndrueshëm.
Sipas presidentes, roli i këtij institucioni bëhet edhe më domethënës në kohën kur shoqëria në Shqipëri dhe Kosovë përballet me ndryshime të shpejta, duke shtuar nevojën për ekspertizë dhe dije. “Për ne, shqiptarët e Kosovës, ky institucion ka qenë dhe mbetet një referencë e rëndësishme e dijes dhe e krenarisë kombëtare”, theksoi Shiroka-Pula.
Në përmbyllje, presidentja shprehu dëshirën që Akademia e Shkencave të vijojë të mbetet një hapësirë e hapur për studiuesit e rinj, duke ofruar frymëzim dhe duke përfaqësuar denjësisht kombin në arenën shkencore dhe kulturore ndërkombëtare. Ajo uroi suksese në botime të reja dhe projekte kërkimore të cilat do të kontribuojnë në forcimin e emrit të shkencës shqiptare.