Presidenti i Republikës së Shqipërisë, Bajram Begaj, ka reaguar për situatën e zjarreve që kanë përfshirë disa zona të vendit gjatë ditëve të fundit, periudhë e karakterizuar nga temperatura të larta. Përmes një komunikimi në rrjetet sociale, Kreu i Shtetit ka vlerësuar përkushtimin dhe sakrificën e zjarrfikësve dhe efektivëve të Forcave të Armatosura, të cilët po angazhohen në vijën e parë të zjarrit për të mbrojtur jetën, banesat dhe pasuritë.
Në mesazhin e tij, Begaj theksoi se keqbërësit që i vënë flakën vendit duhet të ndëshkohen ashpër dhe në përputhje me ligjin. Presidenti kërkoi nga qytetarët që të tregojnë përgjegjshmëri në këto kushte të vështira. Ai u bëri thirrje atyre të respektojnë udhëzimet e autoriteteve, të shmangin çdo veprim që mund të rrezikojë jetën dhe të tregojnë solidaritet për mbrojtjen e komunitetit, pronës dhe natyrës.
“Në këto ditë me temperatura të larta, kur shumë zjarre kanë rënë në disa zona të vendit, zjarrfikësit, efektivët e Forcave të Armatosura dhe të gjithë ata që po luftojnë me flakët meritojnë mirënjohjen tonë. Me guxim, përkushtim dhe sakrificë, ata po mbrojnë jetën, familjet, banesat dhe pasuritë tona. Respekt për çdo zjarrfikës dhe efektiv që po përballet me rrezikun në vijën e parë. Sot, Shqipëria ka nevojë për solidaritetin dhe përgjegjësinë e të gjithëve”, shprehet Presidenti në reagimin e tij.