Presidenti i Republikës, Bajram Begaj, mori pjesë në ceremoninë përmbyllëse të edicionit të 32-të të festivalit "Oda Dibrane" në Peshkopi. Në fjalën e tij, kreu i shtetit e vlerësoi këtë veprimtari si një simbol të bashkimit mes shqiptarëve në të gjitha trevat dhe në diasporë, duke nënvizuar se kultura dhe tradita kapërcejnë kufijtë shtetërorë.
"Sonte jemi së bashku këtu, në Peshkopi. Dy qytete, dy shtete, një Dibër. Një kulturë që nuk e ndajnë dot kufijtë", deklaroi Begaj, duke e cilësuar festivalin si një "odë të madhe shqiptare". Ai theksoi se oda është hapësira ku ruhen mençuria popullore, zakonet dhe vlerat e besës e të mikpritjes. Sipas Presidentit, trashëgimia kulturore nuk duhet të mbetet thjesht një muze që hapet në raste festash, por duhet të jetë një proces i gjallë që përcillet ndër breza përmes këngës, valles dhe gjuhës.
Gjatë vizitës në Dibër, Presidenti u prit nga kryetari i Bashkisë, Rahim Spahiu. Palët diskutuan mbi projektet dhe sfidat për zhvillimin lokal, promovimin e trashëgimisë kulturore dhe nxitjen e potencialeve turistike të zonës. Begaj shprehu mirënjohjen për të gjithë organizatorët, artistët dhe studiuesit që kanë mbështetur festivalin ndër vite, duke uruar që "Oda Dibrane" të mbetet një hapësirë ku tradita gërshetohet me të ardhmen.