Presidenti i Republikës, Bajram Begaj, priti më 28 janar 2026 raportuesin për Shqipërinë në Parlamentin Evropian, Andreas Schieder, në kuadër të misionit faktmbledhës përpara prezantimit të draft-raportit në Komisionin për Punët e Jashtme të këtij parlamenti.
Kreu i Shtetit shprehu mirënjohje për angazhimin e vazhdueshëm dhe mbështetjen e qëndrueshme të Parlamentit Evropian ndaj procesit të zgjerimit. Ai e cilësoi këtë mbështetje thelbësore për ruajtjen e besueshmërisë dhe momentumin e integrimit të Shqipërisë.
Gjatë takimit, Presidenti Begaj i paraqiti raportuesit pikëpamjet e tij në lidhje me zhvillimet aktuale, progresin e reformave dhe hapat konkretë drejt integrimit evropian.
Ai shprehu besimin se rezoluta e ardhshme e Parlamentit Evropian mbi raportin e progresit 2025 do të pasqyrojë në mënyrë objektive arritjet dhe sfidat e mbetura. Kjo rezolutë do të rikonfirmojë angazhimin e palëkundur të Shqipërisë ndaj vlerave evropiane, shtetit të së drejtës dhe demokracisë.