Presidenti i Republikës, Bajram Begaj, vizitoi Ammanin në Jordani më 23 shkurt 2026, me ftesë të Mbretit Abdullah II. Gjatë takimit, krerët e dy vendeve riafirmuan angazhimin për të avancuar bashkëpunimin politik, ekonomik, të sigurisë dhe në fusha të tjera me interes të përbashkët.
Kjo vizitë synon të japë shtysë të re marrëdhënieve dypalëshe dhe të konsolidojë partneritetin e ndërtuar mbi respekt reciprok, miqësi të qëndrueshme dhe mirëkuptim të ndërsjellë. Të dy liderët shprehën vendosmëri për të shndërruar mundësitë në arritje përmes rritjes së investimeve.
Presidenti Begaj vlerësoi potencialin e konsiderueshëm për forcimin e dimensionit ekonomik dhe zhvillimin e turizmit. Ai theksoi rëndësinë e vendosjes së një linje ajrore të drejtpërdrejtë midis Shqipërisë dhe Jordanisë. Gjithashtu, Kreu i Shtetit falënderoi Mbretin Abdullah II për njohjen e Kosovës dhe mbështetjen në forume ndërkombëtare.
Të dy udhëheqësit rikonfirmuan qëndrimin për thellimin e bashkëpunimit shumëpalësh, duke ndarë vizionin për kontribut në stabilitet, demokraci dhe prosperitet rajonal e global. U vlerësua bashkëpunimi në kuadër të Procesit Aqaba.
Presidenti Begaj deklaroi se Shqipëria ka përqafuar dhe promovuar dialogun ndërfetar, duke u angazhuar thellësisht në mbrojtjen e diversitetit fetar dhe duke qenë model i harmonisë fetare.
Diskutimet përfshinë edhe Lindjen e Mesme, ku liderët ndanë bindjen se dialogu dhe zgjidhjet paqësore mbeten rruga e vetme për zgjidhje të drejtë, të qëndrueshme dhe gjithëpërfshirëse, në përputhje me të drejtën ndërkombëtare.
Gjatë vizitës, Presidenti Begaj u takua edhe me Kryeministrin Dr. Jafar Hassan, ku bisedat u fokusuan në nxitjen e marrëdhënieve në ekonomi, turizëm, teknologji të informacionit dhe arsim.