Gustavo Petro, presidenti i Kolumbisë, ka deklaruar se i ka shpëtuar një atentati të dyshuar më 10 shkurt 2026, gjatë një udhëtimi me helikopter në bregdetin e Karaibeve.
Sipas tij, helikopteri, ku ndodheshin edhe vajzat e tij, nuk mundi të ulej në departamentin e Kordobës për shkak të informacioneve se do të goditej nga një sulm i armatosur. “Nuk mundëm të uleshim sepse më njoftuan se helikopteri do të goditej”, u shpreh Petro në një konferencë për shtyp dhe mbledhje të kabinetit të transmetuar drejtpërdrejt.
Helikopteri devijoi drejt detit të hapur për rreth katër orë para se të mbërrinte në një destinacion tjetër të sigurt. Lajmi u konfirmua nga gazetari dhe politikani kolumbian Hollman Morris, i cili përmendi një komplot të dyshuar për mbjelljen e substancash halucinogjene në një automjet presidencial, si dhe plane për sulm ndaj familjes së presidentit.
Petro ka njoftuar se do të ndryshojë vendbanimin pas dy ditësh për arsye sigurie. “Duhet të pranoj se do të zhvendosem për të shmangur vdekjen”, tha ai.
Deklaratat vijnë në kontekstin e zhdukjes së senatores indigjene Aida Quilcué, e cila dyshohet se është rrëmbyer nga grupe të armatosura në një rajon të prekur nga konflikti dhe kultivimi i kokainës. Nuk është hera e parë që Petro, në detyrë që nga viti 2022, paralajmëron për atentate nga rrjete të lidhura me trafikun e drogës.
Qeveria kolumbiane nuk ka dhënë detaje të mëtejshme mbi autorët apo hetimet në vazhdim, ndërsa masat e sigurisë rreth presidentit janë shtrënguar.
Përditësime
Zhvillime të reja në tentativën e atentatit ndaj Presidentit kolumbian Gustavo Petro:
Një dëshmitar konfirmoi se dritat e pistës së uljes nuk ishin ndezur: "Ata nuk i ndezën dritat".
Helikopteri presidencial nuk u ul as në mëngjes nga frika e sulmit, me fëmijët në bord, sipas dëshmive të ekipit.