Presidenti i Libanit, Joseph Aoun, do të zhvillojë takimin e tij të parë dypalësh me presidentin e Shteteve të Bashkuara, Donald Trump, në një vizitë që synon adresimin e krizës së sigurisë në vend. Kjo është hera e parë në gati dy dekada që një kreu i shtetit libanez viziton Shtëpinë e Bardhë.
Në qendër të diskutimeve do të jetë propozimi me shkrim që Aoun do t'i paraqesë Trump, i cili detajon strategjinë për çmontimin e arsenalit ushtarak të grupit militant Hezbollah, të mbështetur nga Irani. Sipas zyrtarëve libanezë, presidenti beson se ndikimi i SHBA-së është vendimtar për të ushtruar presion mbi Izraelin, me qëllim zbatimin e marrëveshjes së ndërmjetësuar më 26 qershor.
Situata në terren mbetet komplekse, me forcat izraelite që ndodhen ende në pjesën jugore të Libanit dhe me qindra mijëra qytetarë të shpërngulur nga banesat e tyre. Hezbollahu, nga ana e tij, ka shfaqur kundërshti ndaj bisedimeve të drejtpërdrejta me Izraelin dhe përpjekjeve për çarmatim. Vizita e Aoun – i cili para zgjedhjes së tij si president vitin e kaluar shërbeu si komandant i ushtrisë libaneze – shihet si një përpjekje për të rimarrë kontrollin shtetëror mbi territorin dhe për t'i dhënë fund pranisë ushtarake të huaj, duke përgatitur terrenin për marrëdhënie paqësore në rajon.