Presidentja e Republikës së Kosovës, Vjosa Osmani, do të dekorojë sot Hasan Aratin në vlerësim të kontributit të tij të çmuar në sportin ndërkombëtar, si dhe të rolit dhe përkushtimit të tij të veçantë në procesin e kandidimit të Kosovës për organizimin e Lojërave Mesdhetare Prishtina 2030.
Ceremonia e dekorimit do të zhvillohet në zyrën e Presidentes Osmani, me fillim në orën 12:00. Në këtë ngjarje do të jenë të pranishëm drejtuesit e Komitetit Olimpik të Kosovës (KOK), të kryesuar nga presidenti Ismet Krasniqi.
Hasan Arati është biznesmen dhe administrator sportiv nga Turqia, me prejardhje shqiptare. Në karrierën e tij sportive ka qenë basketbollist, ndërsa si udhëheqës ka mbajtur role të rëndësishme në organizma ndërkombëtare. Ai është anëtar i Komitetit Olimpik të Evropës, ish-nënpresident i Komitetit Olimpik të Turqisë, kryetar i komisionit koordinues për Lojërat Evropiane Krakoë 2023, udhëheqës i kandidaturës së Stambollit për organizimin e Lojërave Olimpike 2020, ish-anëtar i komisioneve të ndryshme në Komitetin Olimpik Ndërkombëtar (IOC) dhe Asociacionin e Komiteve Olimpike të Azisë (ANOC), si dhe anëtar i Komitetit Ekzekutiv në Federatën Botërore të Atletikës.
Së fundi, gjatë periudhës 2023-2024, Arati ka qenë president i klubit të madh turk të futbollit, Beşiktaş, për më shumë se një vit. Ky vlerësim institucional nënvizon angazhimin e tij në avancimin e sportit dhe fuqizimin e rolit të Kosovës në arenën sportive ndërkombëtare.
Përditësime
Presidentja Vjosa Osmani ka dekoruar Hasan Aratin me medalje presidenciale në një ceremoni të zhvilluar të hënën. Osmani theksoi rolin e tij në sigurimin e drejtës për organizimin e Lojërave Mesdhetare Prishtina 2030. Në ceremoni morën pjesë drejtuesit e Komitetit Olimpik të Kosovës (KOK).
Presidentja Vjosa Osmani vlerësoi kontributin e Hasan Aratit si "të jashtëzakonshëm" dhe vendimtar për kandidaturën e Kosovës në Lojërat Mesdhetare. Gjatë ceremonisë së dekorimit, ajo theksoi se arritjet e tij kanë ndihmuar në promovimin ndërkombëtar të vendit. Hasan Arati, kryetari i Komitetit Olimpik të Turqisë, shprehu nderin për medaljen presidenciale dhe angazhimin për të vazhduar promovimin e Kosovës. Ai përmendi krenarinë e popullit kosovar për arritjet sportive, duke shtuar se Lojërat Mesdhetare përbëjnë një trashëgimi të rëndësishme dhe sporti shërben si dialog diplomatik ndërkombëtar.