Presidentja Vjosa Osmani ka dekoruar Ekipin Kombëtar të Futbollit të Republikës së Kosovës me Medaljen Presidenciale të Meritës. Ceremonia u zhvillua një ditë pas ndeshjes së play-off-it kundër Turqisë, e cila përfundoi me rezultat 0-1 dhe pengoi kualifikimin në Botërorin 2026.
Osmani theksoi se futbollistët kanë veshur me krenari fanellën e Kosovës dhe kanë përfaqësuar dinjitoz shtetin në arenën ndërkombëtare. Dekorata u akordua për përfaqësimin dinjitoz, krenarinë e dhënë popullit dhe arritjen në fazën finale të kualifikimeve. "Pavarësisht rezultatit, ju do të qëndroni në piedestalin më të lartë të Republikës sonë për krenarinë që e keni bërë popullin tonë krenar", deklaroi ajo.
Ajo vlerësoi kontributin e tyre si pjesë të historisë sportive të Kosovës dhe frymëzim për brezat e ardhshëm, duke shprehur besim se rruga përpara do të jetë më e ndritshme.
Në ceremoni morën pjesë presidenti i Federatës së Futbollit të Kosovës, Agim Ademi, trajneri Franco Foda, kapiteni Vedat Muriqi dhe futbollisti Valon Berisha. Muriqi falënderoi presidenten, shtetin, popullin, mediat dhe federatën për mbështetjen. Ai pranoi se humbja ishte goditje e madhe, por ekipi nuk e meritonte dhe fati nuk i favorizoi kundër Turqisë. "Kemi luftuar shumë dhe kemi bërë çmos që ta bëjmë ëndrrën realitet", tha ai.