Tregu i punës në Shqipëri po përjeton presion për shkak të mungesës së fuqisë punëtore, çka ka bërë që bizneset të rrisin pagat mujore dhe të ulin shpenzimet për shpërblime dhe trajnime. Të dhënat e INSTAT-it për treguesit ekonomikë të ndërmarrjeve të 2024 tregojnë se shpenzimet për paga arritën 348 miliardë lekë, me rritje 9% krahasuar me 2023.
Ky trend i rritjes së pagave vjen pas një zhvillimi të vazhdueshëm që nga viti 2021, kur ky zë ishte 232 miliardë lekë. Bizneset kanë zhvendosur buxhetet drejt pagave fikse për të mbajtur punonjësit nga emigrimi dhe për të konkurruar në treg.
Shpenzimet për shpërblime dhe trajnime kanë pësuar rënie 18%, duke zbritur në 2.2 miliardë lekë nga 2.7 miliardë lekë në 2023. Këto shpenzime kanë rënë sistematikisht në vlerë absolute, nga kulmi i 4.4 miliardë lekëve në 2013 në 2.2 miliardë lekë në 2024.
Përqindja e shpërblimeve dhe trajnimeve ndaj shpenzimeve totale për personel zbriti në 0.6% në 2024 nga 0.8% në 2023 dhe nga 3.9% në 2013. Pas pandemisë, kjo peshë ka rënë nën 1%. Bizneset, të prekur nga kostot e larta operacionale, po zgjedhin pagesën fikse në kurriz të bonuseve dhe programeve të rritjes profesionale.
Në kushtet e përparimit të shpejtë të teknologjisë, trajnimet mbeten të rëndësishme për përshtatjen e stafeve me proceset e reja të punës.