Statistikat afatshkurtra të INSTAT për tremujorin e fundit të vitit 2025 nxjerrin në pah rënie të punësimit në sektorin e administrimit të zyrave dhe industrisë, ndërsa rritje në turizëm dhe ndërtim.
Sipas të dhënave zyrtare, aktivitetet mbështetëse të biznesit, si "Administrimi i zyrave dhe mbështetja administrative", kanë pësuar rënie vjetore prej -7.3%, duke u renditur si sektori me tkurrjen më të madhe. Ky sektor shërben si tregues i shëndetit të ndërmarrjeve të tjera, pasi kërkesa për shërbime administrative reflekton performancën e tyre.
Burimet nga tregu i lidhin këtë rënie me automatizimin dhe inteligjencën artificiale, të cilat zëvendësojnë detyra përsëritëse si faturimi, arkivimi dhe menaxhimi i të dhënave. Kjo tendencë negative është shtrirë edhe në transportin dhe magazinimin me -3.3%, industritë nxjerrëse dhe përpunuese me rënie mesatare -2%, si dhe aktivitetet ligjore me -0.7%. Industria përpunuese vuan nga rënia e porosive jashtë, rritja e kostove të brendshme dhe ndikimi i kursit të këmbimit.
Në kontrast, turizmi dhe tregtia nxisin rritjen e punësimit. Hotelet kryesojnë me rritje vjetore +10.8%, të ndjekura nga tregtia me shumicë me +10.1%. Edhe ndërtimi dhe agjencitë e udhëtimit tregojnë rritje të qëndrueshme.
Këto zhvendosje reflektojnë ndryshime në strukturën e ekonomisë shqiptare, ku sektorët e shërbimeve, veçanërisht turizmi, po zëvendësojnë gradualisht ata tradicionalë dhe industrialë.