Tregu i punës në Shqipëri ka shfaqur një trend rritës të kërkesës për fuqi punëtore përgjatë vitit 2025. Sipas shifrave të Agjencisë Kombëtare të Punësimit dhe Aftësive (AKPA), numri i vendeve të lira të punës arriti në 68,860, ndërsa 9,690 subjekte tregtare iu drejtuan Zyrave të Punës për të gjetur personel.
Struktura e kërkesës për punonjës tregon një mbizotërim të profesioneve që kërkojnë aftësi bazë ose zejtare:
• Profesione elementare: 29.9%
• Zanatçinj dhe profesione të lidhura: 23.7%
• Punonjës të shitjeve dhe shërbimeve: 15.9%
• Punonjës në industri: 10.5%
Në të kundërt, pozicionet që kërkojnë kualifikim të lartë akademik apo teknik janë raportuar në nivele më modeste. Specialistët me arsim të lartë zunë 6.4% të totalit, ndërsa teknikët dhe specialistët e mesëm përfaqësuan 5.3% të kërkesave të shpallura nga bizneset. Qarqet Tiranë, Durrës dhe Vlorë vijojnë të jenë zonat me volum më të lartë të vendeve të lira të punës, duke konfirmuar përqendrimin e aktivitetit ekonomik në këto rajone.