Gianluca Prestianni ka zbuluar një detaj të ri në lidhje me incidentin me Vinicius Junior gjatë ndeshjes së parë të fazës së play-off-it të Ligjës së Kampionëve ndërmjet Benficës dhe Real Madridit.
Lojtari argjentinas u akuzua fillimisht për përdorimin e një shprehjeje racore, duke e quajtur brazilianin “majmun” dhe duke bërë gjeste të papranueshme. Ai e ka mohuar këtë, duke deklaruar se përdori një shprehje homofobike ndaj Vinicius-it dhe ua komunikoi këtë version UEFA-s.
Ndërkohë që UEFA zhvillon hetimin, Prestianni pritet të ngrejë kundërakuzë, duke pretenduar se Vinicius e talli për gjatësinë e tij. Sipas The Times, argjentinasi do të mbrohet duke thënë se braziliani e quajti “xhuxh”, çka e shtyu të përgjigjet me fyerjen homofobike.
Me një gjatësi prej 166 cm, Prestianni është një nga lojtarët më të shkurtër në futbollin elitar dhe në Ligën e Kampionëve këtë sezon.
Talljet për racën ose orientimin seksual shkelin Nenin 14 të rregulloreve të UEFA-s, por tallja për gjatësinë ose karakteristika të tjera fizike, si madhësia e veshëve, nuk mbulohen nga këto rregulla. Raportet theksojnë se mbrojtja e Prestiannit, e bazuar në hakmarrje, është e paqëndrueshme dhe nuk pritet të konsiderohet justifikim i vlefshëm.