Në stadiumin "Bajram Aliu" në Skenderaj, Prishtina regjistroi një fitore bindëse ndaj Drenicës në takimin e vlefshëm për javën e pestë të kampionatit. Mysafirët kaluan të parët në avantazh në minutën e 5-të, përmes Kastriot Selmanit, i cili shënoi pas një asistimi nga Assane Diatta. Vendasit arritën të barazonin shifrat në minutën e 40-të, kur kapiteni Shkëlzen Lushtaku shënoi me kokë pas një harkimi të Genc Hamitit, pas një rishikimi të situatës në VAR.
Në pjesën e dytë, ekipi i drejtuar nga Orges Shehi mori kontrollin e lojës. Në minutën e 50-të, Diar Halili riktheu epërsinë për kryeqytetasit me një gol me kokë pas një harkimi të Kastriot Selmanit. Avantazhi u thellua në minutën e 57-të, kur Assane Diatta u tregua i saktë nga pika e bardhë e penalltisë. Rezultatin përfundimtar 4-1 e vulosi Arianit Hasani në minutat e fundit të ndeshjes, pas një pasimi të marrë nga Arfian Muja.
Me këtë sukses, Prishtina renditet në vendin e parë me 12 pikë, duke pasur gjithashtu një ndeshje më pak të zhvilluar, atë ndaj Dritës. Nga ana tjetër, Drenica vazhdon të përballet me vështirësi në kampionat, duke qëndruar në pjesën e poshtme të tabelës me vetëm 3 pikë pas pesë javësh.
Përditësime
Skuadra e Llapit regjistroi fitoren e parë për këtë sezon, duke mposhtur Vushtrrinë me rezultatin bindës 4-0. Autorët e golave për llapjanët ishin Arbnor Ramadani, Fiton Ademi, Arianit Hasani dhe Mërgim Cërnavërni.