Drejtori i Arsimit në Komunën e Prishtinës, Arianit Elshani, bëri të ditur se përgatitjet për fillimin e vitit të ri shkollor janë në fazën përfundimtare. Sipas njoftimit, mësimi tërëditor do të zgjerohet në katër institucione arsimore: shkollën “Mehmet Gjevori”, “Afrim Gashi”, shkollën në Vranidoll dhe “Asim Vokshi”.
Në lidhje me riorganizimin e procesit mësimor, shkolla “Asim Vokshi” do të pranojë paralelet nga klasa e parë deri në të pestën, ndërsa nxënësit do të barten nga shkolla “Zejnel Hajdini”. Elshani theksoi se po ndërmerren masa për të garantuar gatishmërinë teknike dhe furnizimin me materiale pedagogjike në të gjitha shkollat e kryeqytetit për datën 1 shtator.
Një ndryshim thelbësor për këtë vit është vendosja e kriterit të zonimit për regjistrimet në klasat e para. Për të rritur cilësinë e mësimdhënies, është kufizuar numri i nxënësve në 30 për klasë, një masë që, sipas drejtorit, është respektuar në 95% të shkollave. Përjashtime janë regjistruar vetëm në shkollën “Model” dhe “Faik Konica”, për shkak të kërkesave të larta. Gjithashtu, është pamundësuar regjistrimi i nxënësve nga komunat e tjera, pavarësisht vendit të punës së prindërve, duke bërë që regjistrimi të bazohet vetëm në vendbanimin e nxënësve të shkollës përkatëse.