Prokuroria Themelore në Prizren ka njoftuar se ka paraqitur kërkesë për caktimin e masës së paraburgimit ndaj të pandehurit me inicialet A.D., i cili akuzohet për kryerjen e veprës penale "Asgjësimi i dokumenteve të votimit".
Sipas hetimeve të deritanishme, më 7 qershor 2026, gjatë procesit të zgjedhjeve parlamentare për Kuvendin e Republikës së Kosovës, i pandehuri në cilësinë e anëtarit të komisionit zgjedhor, dyshohet se ka shkëputur nga blloku dhe më pas ka fshehur gjashtë (6) fletëvotime të paplotësuara. Ngjarja ka ndodhur në qendrën e votimit të vendosur në shkollën "Sharr" në fshatin Jabllanicë të Prizrenit.
Organi i akuzës bën të ditur se këto veprime janë kryer me qëllim të pengimit të zhvillimit të rregullt të procesit zgjedhor dhe cenimit të vullnetit të lirë të qytetarëve. Prokuroria Themelore në Prizren ka theksuar se do të trajtojë me prioritet të gjitha rastet që ndikojnë në integritetin e proceseve zgjedhore dhe do të vijojë bashkëpunimin me organet e zbatimit të ligjit për zbardhjen e plotë të çështjes.
Përditësime
Prokuroria Themelore në Prizren ka kërkuar caktimin e paraburgimit për Adnan Demiri-n, anëtar i komisionit zgjedhor dhe ish-kandidat i Koalicionit Vakat, nën dyshimet për veprime të kundërligjshme gjatë procesit zgjedhor. Zëvendëskryeministrja Emilia Rexhepi është distancuar nga ky rast, duke kërkuar zbardhjen e plotë të akuzave ndaj të pandehurit.