Programi qeveritar Dyfisho Sipërmarrjen Tënde po shënon një interes të gjerë nga ndërmarrjet e vogla dhe të mesme në Shqipëri. Zëvendëskryeministrja Albana Koçiu bëri të ditur se mbi 1 700 biznese kanë shfaqur interes për këtë instrument financiar, ndërsa 800 prej tyre ndodhen aktualisht në proces trajtimi.
Në dhjetë ditët e para nga lançimi i platformës në portalin e-Albania, janë regjistruar 241 aplikime zyrtare. Sipas të dhënave, 222 raste po shqyrtohen nga bankat e nivelit të dytë, ndërsa 20 biznese kanë marrë tashmë miratimin për financim. Programi synon të mbështesë bizneset në zgjerimin e kapaciteteve prodhuese, blerjen e makinerive dhe teknologjive të reja.
Kushtet e financimit
Mbështetja financiare ofrohet përmes një linje krediti që fillon nga 250 milionë euro, me mundësi zgjerimi deri në 1 miliard euro. Kushtet kryesore të programit përfshijnë:
• Financim deri në 2 milionë euro për secilin subjekt.
• Normë interesi preferenciale, e llogaritur mes 2% dhe 3%.
• Mbulim nga Garancia Sovrane deri në 70%, varësisht nga vlerësimi i bankave.
Zëvendëskryeministrja Koçiu theksoi se programi u ofron sipërmarrjeve mundësinë për të tejkaluar vështirësitë në sigurimin e kapitalit, duke nxitur rritjen ekonomike dhe krijimin e vendeve të reja të punës. Investimet e miratuara deri më tani janë orientuar në sektorë të ndryshëm si bujqësia, prodhimi, transporti dhe hoteleria, duke përfshirë qytete si Tirana, Shkodra, Vlora, Berati, Fieri dhe Lushnja.