Kryeministri Edi Rama prezantoi programin e ri "Dyfisho ndërmarrjen tënde" gjatë episodit të së dielës së podcastit "Flasim", me titull "S’ka si Shqipëria". Ky program po përgatitet nga qeveria për të ndihmuar sipërmarrjet e vogla dhe të mesme, të cilat dëshirojnë të zgjerojnë aktivitetin, por përballen me vështirësi financiare.
Në bashkëbisedim morën pjesë sipërmarrës shqiptarë të suksesshëm, si biologja Nerta Tushe, e angazhuar në fushën e kozmetikës, Argjent Goci, që ka sjellë makinat e para elektrike në Shqipëri, dhe Marjus Myzeqari, i specializuar në kërkime shkencore mbi lidhjen mes shëndetit të njeriut dhe natyrës.
Sipas Edi Ramës, programi synon të mbështesë sipërmarrjet që kanë krijuar një bazë të qëndrueshme, por nuk arrijnë të bëjnë hapin tjetër për mungesë financimi. Ai theksoi se kjo nismë është nxitur prej tij dhe pritet të përfundojë shpejt.
Programi parashikon instrumente financiare të dedikuara për të lehtësuar aksesin në fonde. Një element kyç është garancia sovrane, e ngjashme me mbështetjen për sipërmarrjet bujqësore. Në disa raste, bashkitë mund të përfshihen, në varësi nga natyra e sipërmarrjes.
Qëllimi është të nxisë rritjen e sipërmarrjeve, të kontribuojë në zhvillimin ekonomik dhe të krijojë më shumë mundësi punësimi në vend.