Pas numërimit të një pjese të votave në zgjedhjet parlamentare, janë bërë publike projeksionet për përbërjen e legjislaturës së 11-të të Kuvendit të Kosovës. Eksperti i zgjedhjeve nga organizata Demokracia në Veprim (DnV), Eugen Cakolli, theksoi se këto shifra pasqyrojnë situatën aktuale, por nuk janë përfundimtare.
Sipas projeksionit, shpërndarja e mandateve për subjektet politike paraqitet si më poshtë:
• Lëvizja Vetëvendosje: 48 ulëse
• Partia Demokratike e Kosovës (PDK): 24 ulëse
• Lidhja Demokratike e Kosovës (LDK): 20 ulëse
• Aleanca për Ardhmërinë e Kosovës (AAK): 8 ulëse
Cakolli njoftoi se në këto llogaritje ende nuk janë përfshirë rreth 100 mijë vota nga diaspora dhe votat me kusht. Duke u bazuar në trendet e proceseve të mëparshme zgjedhore, eksperti vlerësoi se këto vota kanë potencialin të ndikojnë në shpërndarjen e rreth pesë mandateve, çka mund të ndryshojë balancën përfundimtare midis subjekteve politike pas përfundimit të numërimit nga institucionet përkatëse.