Projektbuxheti për vitin 2027 parashikon 114.6 miliardë lekë për pushtetin vendor, një rritje prej 2.4% krahasuar me vitin 2026. Shuma është planifikuar për 61 bashki dhe përfshin fonde edhe për 15 njësi që pritet të humbasin statusin si bashki më vete pas zbatimit të reformës territoriale.
Nga buxheti i shtetit, transfertat për njësitë e vetëqeverisjes vendore parashikohen në 49.4 miliardë lekë, ose 4% më shumë se në vitin 2026. Transferta e pakushtëzuar e përgjithshme arrin në 29.3 miliardë lekë, me rritje prej 5.2%, ndërsa transferta e pakushtëzuar sektoriale parashikohet në 19.9 miliardë lekë, 2.4% më shumë se një vit më parë.
Sipas Lapsi.al, rreth 58.6 miliardë lekë të buxhetit vendor pritet të sigurohen nga të ardhurat e vetë bashkive, ndërsa pjesa tjetër do të vijë nga buxheti i shtetit. Përfituesit kryesorë janë Tirana, me rreth 7.07 miliardë lekë, Durrësi me 2.69 miliardë, Elbasani me 2.09 miliardë, Fieri me 1.88 miliardë dhe Vlora me 1.69 miliardë lekë.
Për 15 bashkitë që pritet të humbasin statusin si njësi më vete janë parashikuar gjithsej 5.95 miliardë lekë, afërsisht 6 miliardë. Maliqi përfiton shumën më të madhe, rreth 797 milionë lekë, i ndjekur nga Divjaka me 575 milionë, Përrenjasi me 486 milionë dhe Cërriku me 452 milionë lekë. Sipas Lapsi.al, këto bashki do të vijojnë të funksionojnë deri në zgjedhjet vendore të vitit 2027. Reforma do ta ulë numrin e bashkive nga 61 në 46.
Pas konsolidimit të njësive të reja, fondet e papërdorura pritet t’u kalojnë bashkive pritëse. Megjithatë, projektbuxheti nuk jep hollësi për mënyrën se si do të kalojnë fondet, projektet, kontratat dhe detyrimet financiare. Reforma territoriale dhe ndryshimet financiare parashikohet të zbatohen brenda të njëjtit vit financiar.