Zhvillimet për projekte të reja turistike në Sazan dhe Zvërnec kanë nxitur reagime të shumta, ku përkrah shqetësimeve mjedisore, janë shfaqur narrativa dezinformuese që synojnë nxitjen e teorive konspirative dhe pretendimeve etnike.
Sipas raporteve, influencues të lidhur me propagandën ruse, si llogaria JOKAQARMY1, po shpërndajnë pretendime se ishulli i Sazanit po shndërrohet në një version të ri të “ishullit të Jeffrey Epstein”. Këto burime akuzojnë kryeministrin Edi Rama për shitje të zonave të mbrojtura tek investitorë të huaj, si Jared Kushner dhe familja Trump.
Paralelisht, llogari me profil nacionalist grek në platformën X po përhapin teza që ndërthuren me pretendime territoriale:
- Ishulli i Sazanit po portretizohet në mënyrë të pasaktë si “ishulli grek Sason”, i banuar që nga antikiteti. Faktet gjeografike konfirmojnë se ishulli nuk ka qenë asnjëherë zonë e banuar për shkak të mungesës së burimeve të ujit të pijshëm.
- Zona e Zvërnecit po cilësohet nga këto llogari si fshat “vorioepirot”, duke pretenduar se qeveria shqiptare po sekuestron shtëpitë e banorëve për t'ia dorëzuar zhvilluesve.
- Në këto postime përmenden pretendime për masakra historike në vitin 1914, të cilat përdoren për të ndikuar ndjenjat kundër projekteve aktuale të zhvillimit turistik.
Ekspertët vlerësojnë se këto narrativa shfrytëzojnë tensionet e vjetra për të ndikuar opinionin publik, duke ndërthurur qëllimisht keqinformimin me shqetësimet reale mjedisore të protestuesve.