Qeveria shqiptare ka publikuar për konsultim publik një projektligj të ri për donacionet dhe sponsorizimet, i cili zëvendëson ligjin e vitit 1994. Drafti, hartuar nga Ministri i Shtetit për Administratën Publike dhe Antikorrupsionin në bashkëpunim me Ministrin për Turizmin, Kulturën dhe Sportin, synon rritjen e transparencës dhe llogaridhënies së organeve publike. Ai është pjesë e angazhimeve për integrimin evropian dhe luftën kundër korrupsionit.
Projektligji bën dallim të qartë midis donacionit, si mbështetje vullnetare pa përfitim, dhe sponsorizimit, si marrëveshje kontraktuale me të drejtë reklamimi.
Përjashtimet dhe ndalimet
- Personat e dënuar për korrupsion, pastrim parash, evazion fiskal ose trafikim.
- Kompanitë në faliment ose likuidim.
- Bizneset e lojërave të fatit, duhanit dhe alkoolit për sponsorizim të organeve publike.
- Financimet anonime.
Sistemet e drejtësisë dhe Policia e Shtetit nuk mund të pranojnë sponsorizime. Çdo kontratë kërkon dokumente për verifikimin e pastërtisë ligjore dhe financiare të sponsorizuesit.
Regjistri Kombëtar Elektronik
Krijohet një Regjistër Kombëtar Elektronik i Donacioneve dhe Sponsorizimeve, i administruar nga Drejtoria e Përgjithshme e Tatimeve. Donacionet mbi 500 mijë lekë dhe të gjitha sponsorizimet regjistrohen detyrimisht. Të dhënat për organet publike janë të aksesueshme për publikun, median dhe shoqërinë civile, ndërsa për OJQ-të dhe subjektet private vetëm për organet ligjzbatuese.
Fushat e zbatimit dhe lehtësitë
Projektligji zbatohet për veprimtari në:
- Shërbime sociale dhe humanitare.
- Art, kulturë dhe trashëgimi.
- Edukim dhe zhvillim të të rinjve.
- Shëndet publik.
- Mbrojtje të mjedisit dhe klimës.
- Sport dhe edukim fizik.
- Shkencë, inovacion, transformim digjital, të drejta njeri dhe barazi gjinore.
Për sponsorizimet në art, kulturë dhe sport parashihen zbritje tatimore deri në 30% të tatimit mbi fitimin. Shkeljet dënohen me gjoba nga 200 mijë deri në 300 mijë lekë.
Përditësime
Projektligji parashikon gjoba specifike sipas Nenit 27:
- 50.000–100.000 lekë për mos publikimin e marrëveshjeve nga organet publike;
- 100.000–200.000 lekë për fshehje ose deklarim të pasaktë të të dhënave në Regjistër nga OJQ, organizata sportive, subjekte filmi dhe individë në art/sport.
Pranimi i sponsorizimeve të paligjshme nga subjekte private përbën kundërvajtje administrative.
Organet tatimore nuk aplikojnë lehtësira tatimore për kundërvajtësit.