Nicolás Maduro dhe bashkëshortja e tij Cilia Flores u përballën në një seancë gjyqësore në Nju Jork me drejtësinë amerikane. Prokurorët e Shteteve të Bashkuara e akuzuan Maduron se ka plaçkitur pasurinë e Venezuelës dhe nuk duhet të lejohet të përdorë fondet shtetërore të bllokuara nga sanksionet për të paguar avokatët.
Në qendër të debatit ishte nëse Maduro dhe Flores mund të përdorin paratë e qeverisë venezueliane për mbrojtjen e tyre. Avokatët e tyre pohuan se ndalimi i këtyre fondeve cenon të drejtën kushtetuese për mbrojtje të drejtë dhe zgjedhje të lirë të avokatit.
Prokurorët amerikanë këmbëngulën se leja për përdorim të fondeve shtetërore do të ishte e papranueshme, pasi Maduro ka përfituar personalisht nga pasuritë e Venezuelës dhe kjo bie ndesh me interesat e sigurisë kombëtare të SHBA-ve.
Gjykatësi federal Alvin Hellerstein u shfaq skeptik ndaj argumenteve të prokurorisë, duke theksuar se e drejta për mbrojtje është parësore. Ai refuzoi të rrëzojë çështjen dhe njoftoi se do të japë vendim në një datë të mëvonshme.
Maduro dhe Flores ndodhen në paraburgim në SHBA që prej janarit 2026, pasi u kapën gjatë një operacioni të forcave amerikane në Karakas dhe u dërguan në Nju Jork për t’u përballur me akuza për narko-terrorizëm dhe trafik droge, të cilat i mohojnë.
Seanca u zhvillua në atmosferë më të qetë se paraqitja e parë. Çështja ka pasoja politike dhe diplomatike në marrëdhëniet midis SHBA-ve dhe Venezuelës, të cilat kanë nisur të përmirësohen pas arrestimit.