Geoffrey Nice, një nga prokurorët kryesorë që ndoqi Slobodan Millosheviçin, vlerëson se dënimi eventual i ish-krerëve të Ushtrisë Çlirimtare të Kosovës nga Dhomat e Specializuara të Kosovës në Hagë do të jetë barrë e rëndë për vendin.
“Do të ishte një barrë për një shtet që do të jetojë me një dënim të tillë”, tha ai në një intervistë për Kanal 10, duke shtuar se Kosova, si shtet në fazë të hershme zhvillimi, do ta kishte të vështirë ta mbante një dënim të tillë.
I pyetur për kërkesën e Zyrës së Prokurorisë së Specializuar që Hashim Thaçi, Kadri Veseli, Jakup Krasniqi dhe Rexhep Selimi të dënohen me nga 45 vjet burgim secili, Nice e cilësoi atë si shumë të çuditshme dhe befasuese. “Më duket një kërkesë goxha e çuditshme nga prokuroria, duke marrë parasysh dënimet për krime më serioze, kërkesë befasuese do të thoja”, shtoi ai.
Të mërkurën në Dhomat e Specializuara të Kosovës u dëgjuan fjalët përfundimtare të ish-krerëve të UÇK-së. Secili prej tyre nguli këmbë se ndihen plotësisht të pafajshëm dhe cilësoi akuzat e Zyrës së Prokurorisë së Specializuar si të pabazuara dhe të padrejta.