Prokuroria pranë Gjykatës së Shkallës së Parë të Juridiksionit të Përgjithshëm Korçë ka përfunduar hetimet për procedimin penal nr. 1064/2025 dhe ka dërguar në gjyq 31-vjeçarin Ilirjan Selmani (I.S.), të akuzuar për vrasje në rrethana të tjera cilësuese, parashikuar nga neni 79/e i Kodit Penal, ndaj 52-vjeçares Kozeta Teço (K.T.).
Ngjarja u raportua në korrik 2025 në lagjen nr. 1 të Pogradecit, ku u shënua zjarr në banesën e viktimës. Në vendngjarje u konstatuan disa vatra zjarri dhe shenja dhune në trupin e saj. Ekspertiza mjeko-ligjore përcaktoi se shkaku i vdekjes ishte shoku traumatiko-hemoragjik, i shkaktuar nga plagë të shumta me mjete prerëse.
Në tualetin e banesës, brenda një qese mbeturina, u gjetën:
- një dorezë thike;
- një teh thike;
- një thikë me bisht druri;
- një teh tjetër thike të ndotur me lëndë të kuqërremtë.
Analizat biologjike konfirmuan se këto mjete përmbanin gjak dhe fije flokësh të viktimës. Gjithashtu, në xhepin e pasëm të pantallonave të të pandehurit u gjet gjak i Kozeta Teços.
Pamjet filmike nga kamerat përreth treguan se Ilirjan Selmani hyri në banesë në orën 22:48 dhe u largua rreth orës 04:58 sipas kohës reale, pasi hodhi qeset në koshin e mbeturinave. Hetimet vërtetuan se të dyshuari dhe viktima kishin marrëdhënie intime për mbi tre vjet, me vizita 2-3 herë në javë në banesën e saj.
Gjatë marrjes në pyetje, Selmani pranoi disa episode, por mohoi kryerjen e krimit. Ai njihej nga policia si përdorues i lëndëve narkotike dhe shfaqte simptoma depresioni, ndërsa viktima kishte probleme shëndeti mendor kohët e fundit.