Prokuroria e Tiranës ka shpallur moskompetencë për dosjen e zhdukjes së verës së sekuestruar të Ergys Agasit. Këtë të mërkurë, dosja i kaloi Strukturës së Posaçme Kundër Korrupsionit dhe Krimit të Organizuar (SPAK), e cila pritet ta bashkojë me procedimet penale për abuzimet me AKSHI-në.
Bëhet fjalë për rreth 600 shishe verë të markave të shtrenjta, të sekuestruara në vinotekën e vilës së Ergys Agasit në periferi të Tiranës. Këto shishe u zhdukën pa gjurmë brenda 24 orëve pas operacionit hetimor. Në kërkim është shpallur Eno Agasi, i afërmi i Ergys Agasit.
Vlera e verës së zhdukur, sipas përllogaritjeve paraprake, tejkalon 1.3 milionë euro. Gjatë operacionit fillestar u paralajmërua hetimi i rolit të doganave, personave dhe institucioneve të tjera që kishin në ruajtje mallin e sekuestruar.
Tani pritet që SPAK të sqarojë rolin e personave përgjegjës për zhdukjen e verës, në kuadër të hetimeve më të gjera për abuzimet me AKSHI-në.