Prokuroria e Vlorës ka kërkuar dhe Gjykata e Shkallës së Parë të Juridiksionit të Përgjithshëm Vlorë ka miratuar sekuestrimin e pasurive me vlerë totale 400 mijë euro të shtetasit A.Rr. (Arjan Rrokaj) dhe familjarëve të tij. Kjo ndodhi në kuadër të procedimit penal nr. 1125/2020 për veprën penale të pastrimit të produkteve të veprës penale ose veprimtarisë kriminale, parashikuar në nenin 287 të Kodit Penal.
Hetimet treguan se A.Rr., i dënuar më parë për trafik të lëndëve narkotike dhe organizatë kriminale nga Gjykata e Breshias me 8 vite burg, nuk justifikon pasuritë e krijuara me të ardhura të ligjshme. Ai u arrestua në Vlorë në mars 2025 për ekstradim drejt Italisë.
Pasuritë e sekuestruara preventive përfshijnë:
- Apartament me nr. 29/519+2-2, sipërfaqe 67 m², Vlorë, në zotërim të A.Rr. dhe B.B.;
- Apartament me nr. 29/599+1-22, sipërfaqe 73 m², Vlorë, në zotërim të A.Rr. dhe B.B.;
- Apartament me nr. 113/34+2-20, sipërfaqe 68.8 m², ZK 3292, Tiranë, në zotërim të B.B.;
- Njësi me nr. 12/417-N4, ZK 8602, sipërfaqe 27 m², Vlorë, në zotërim të A.Rr.;
- Automjet Toyota Corolla, viti 2020, në zotërim të B.B.;
- Automjet Volvo XC60, viti 2020, në zotërim të B.B.;
- Automjet Mercedes-Benz GLA, viti 2016, në zotërim të S.Rr..
Gjykata vendosi masën e sigurimit pasuror për të gjitha këto pasuri të paluajtshme dhe luajtshme.