Në Tiranë u finalizua operacioni policor i koduar “Burimi”, ku u sekuestruan pasuri me vlerë rreth 200 mijë euro në pronësi të dy shtetasve të dënuar për trafikim të lëndëve narkotike.
U sekuestrua një apartament në zonën e Selitës dhe një garazh në Selitë të Vogël. Këto pasuri u përkasin shtetasit Pajtim Braçaj, 63 vjeç, i dënuar në Shqipëri për trafikim të lëndëve narkotike, dhe shtetasit Gjino Lleshaj alias Shkelqim Lleshaj, 44 vjeç, i dënuar në Itali për të njëjtën vepër penale.
Operacioni u zhvillua nga Seksioni për Hetimin e Pastrimit të Parave dhe Aseteve Kriminale në Drejtorinë Vendore të Policisë Tiranë, në bashkëpunim me Prokurorinë e Tiranës. Ai synonte gjurmimin dhe sekuestrimin e pronave të lidhura me veprimtari kriminale brenda dhe jashtë vendit. Vendimi për sekuestron preventiv u mor nga Gjykata e Tiranës.
Sipas të dhënave, Pajtim Braçaj ishte një nga shtatë personat e arrestuar më 17 tetor 2015, pas zbulimit të një laboratori droge në zonën e ish-Kënetës së Durrësit dhe sekuestrimit të 700 kg kanabis sativa. Ai dyshohej për transportin e lëndës narkotike nga Kruja në laboratorin e Durrësit, në kuadër të operacionit “Koordinata”, të zhvilluar nga Policia e Durrësit, Tiranës, Shkodrës dhe ish-Prokuroria e Krimeve të Rënda.
Hetimi për gjurmimin dhe sekuestrimin e aseteve të tjera me origjinë kriminale, në pronësi të këtyre shtetasve dhe personave të lidhur me ta, vazhdon.