Policia e Tiranës ka arrestuar në flagrancë tre shtetas për trafik lëndësh narkotike në kryeqytet. Ngjarja ndodhi më 25 janar 2026, në kuadër të operacionit policor të koduar "Cargo 2", të zhvilluar nga Specialistët e Seksionit të Hetimit të Narkotikëve.
Shërbimet policore lokalizuan në Unazën e Madhe, afër rrethrrotullimit të Tegut, automjetin tip Escalade me drejtues Alban Kopaçin, 32 vjeç, dhe pasagjerët Elvi Metan, 26 vjeç, dhe Igli Canajn, 33 vjeç, të gjithë banues në Tiranë. Gjatë kontrollit të automjetit u gjet një pako me 1 kg e 36.6 gramë lëndë të dyshuar narkotike të llojit kokainë.
Sekuestrot e kryera
- 1 kg e 36.6 gramë kokainë në automjet;
- 1 armë zjarri pistoletë, 1 armë gjahu dhe municion luftarak në banesën e Alban Kopaçit;
- 121 000 euro, 60 milionë lekë dhe 5000 paund para në banesën e të arrestuarit;
- Automjeti tip Escalade dhe 5 telefona celularë;
- Sende të tjera të kundërligjshme.
Nga verifikimet rezulton se të arrestuarit, në bashkëpunim me njëri-tjetrin, siguronin kokainë dhe furnizonin disa grupe shpërndarësish në zona të ndryshme të Tiranës. Alban Kopaçi konsiderohet kreu i grupit dhe ka pasur dënim të mëparshëm për të njëjtën vepër penale.
Materialet procedurale i kaluan Prokurorisë së Tiranës për veprime të mëtejshme hetimore.