Seksioni për Hetimin e Narkotikëve, në bashkëpunim me Forcën e Posaçme "Shqiponja", ka zhvilluar një operacion policor në kryeqytet për goditjen e shitjes së lëndëve narkotike. Si rezultat, në pranga kanë rënë katër shtetas, të cilët dyshohet se ushtronin këtë veprimtari në zona të ndryshme të Tiranës.
Shtetasit E. S., I. D. dhe F. Gj. u kapën në flagrancë në Rrugën e Kavajës. Sipas hetimeve, këta persona siguronin sasi të konsiderueshme kokaine, të cilat i ndanin në doza dhe i shpërndanin kryesisht në zonat e njohura si "Ish-parku" dhe "Brryli". Në të njëjtën kohë, autoritetet ndaluan shtetasin E. D., i cili dyshohet se shpërndante doza kokaine në ambientet e subjektit ku ishte i punësuar.
Gjatë këtij operacioni policia sekuestroi:
• Mbi 400 gramë lëndë të dyshuar narkotike kokainë;
• Mbi 220 doza të përgatitura për shitje;
• 2 peshore elektronike;
• 4 celularë dhe shuma parash.
Materialet procedurale i janë referuar Prokurorisë për hetime të mëtejshme mbi veprën penale të shitjes dhe shpërndarjes së lëndëve narkotike.
Përditësime
Policia e Tiranës ka identifikuar katër të arrestuarit e operacionit të datës 13 qershor si: Ilir Doda, Elger Spahiu, Florian Gjyzeli dhe Erjon Dani. Gjatë kontrollit, autoritetet sekuestruan lëndën narkotike në dy sasi: 350 gramë kokainë në posedim të grupit dhe 220 doza të tjera të gjetura tek shtetasi Erjon Dani.