Specialistët e Seksionit për Hetimin e Narkotikëve pranë Drejtorisë Vendore të Policisë Tiranë finalizuan operacionin policor të koduar "Bulevardi", duke vënë në pranga 44-vjeçarin S.K., i identifikuar nga disa burime si Sokol Kuçi. Ndalimi i tij u bë në rrugën "Riglata", ndërsa po transportonte lëndë narkotike për ta shpërndarë në zonën e Bulevardit të Ri dhe në segmentet që lidhin kryeqytetin me Urën e Paskuqanit.
Gjatë kontrollit fizik, shërbimet e Policisë sekuestruan dy paketime me peshë totale 1 kilogram e 680 gramë kokainë. Sipas hetimeve paraprake, i arrestuari dyshohet se shërbente si furnizues për persona të tjerë të përfshirë në shitjen e drogës në doza, përveçse shpërndante vetë një pjesë të sasisë.
Ky aksion është pjesë e masave ndaj veprimtarisë kriminale në fushën e narkotikëve. Në vijim të operacionit të koduar "Zonat", të zhvilluar përgjatë muajve maj dhe qershor, Policia ka sekuestruar gjithsej rreth 1.5 kilogramë kokainë dhe 1.1 kilogramë heroinë.
Materialet procedurale i janë referuar Prokurorisë pranë Gjykatës së Juridiksionit të Përgjithshëm Tiranë, për veprën penale "Prodhimi dhe shitja e narkotikëve". Autoritetet vijojnë hetimet për të identifikuar persona të tjerë të përfshirë në këtë rrjet kriminal.