Specialistët e Seksionit për Hetimin e Narkotikëve në Drejtorinë Vendore të Policisë Tiranë zhvilluan një operacion antidrogë, ku si rezultat u bë kapja në flagrancë e shtetasit Erald Tafani, 35 vjeç. Ndalimi i tij u realizua në afërsi të një njësie pushimi në fshatin Bërzhitë.
Gjatë kontrollit fizik dhe atij të ushtruar në banesën e të arrestuarit, shërbimet e Policisë gjetën dhe sekuestruan në cilësinë e provës materiale:
• 833 gramë lëndë e dyshuar narkotike e llojit kokainë;
• 576 gramë lëndë e dyshuar narkotike e llojit cannabis sativa;
• 930 euro, të dyshuara si të përfituara nga aktiviteti i paligjshëm;
• Automjetin e përdorur nga i dyshuari.
Sipas hetimeve paraprake, shtetasi Erald Tafani siguronte dhe shpërndante lëndë narkotike në sasi të konsiderueshme, kryesisht në zonën e Bërzhitës dhe në Qytet Studenti. Materialet procedurale i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme hetimore.