Seksioni për Hetimin e Trafikut të Paligjshëm dhe Narkotikëve në Tiranë ka finalizuar operacionin policor të koduar “Zonat”, që kishte si objektiv goditjen e shpërndarjes së lëndëve narkotike në kryeqytet. Në kuadër të këtij aksioni, është vënë në pranga shtetasi Ksainel Caka, 37 vjeç, banues në Tiranë, i cili nuk rezulton me precedentë të mëparshëm penalë.
Ndërhyrja e forcave të rendit u realizua në rrugën “Skënderbej”, pranë hyrjes së bllokut të ambasadave në rrugën e Durrësit. Agjentët e Antidrogës e mbanin nën vëzhgim të dyshuarin prej disa javësh. Gjatë kontrollit fizik, shërbimet e policisë gjetën dhe sekuestruan mbi 200 gramë lëndë të dyshuar narkotike të llojit kokainë, e cila në tregun e zi kap vlerën e rreth 700 mijë lekëve të rinj.
Sipas hetimeve paraprake, Ksainel Caka dyshohet se kishte rolin e furnizuesit për persona të tjerë, të cilët më pas e shpërndanin drogën në doza të vogla. Aktivitetin kriminal ai e ushtronte kryesisht në zonat e Don Boskos dhe Laprakës. Policia e Shtetit, në bashkëpunim me Prokurorinë, po vijon hetimet për të identifikuar dhe kapur persona të tjerë të përfshirë në këtë rrjet shpërndarjeje.