Specialistët e Seksionit për Hetimin e Narkotikëve pranë Drejtorisë Vendore të Policisë Tiranë finalizuan operacionin policor të koduar “Destinacioni”, në kuadër të masave për goditjen e shpërndarjes së lëndëve narkotike në kryeqytet. Si rezultat i këtij operacioni, u arrestua në flagrancë shtetasi A. K., 38 vjeç, banues në Tiranë.
Ndërhyrja u zhvillua në fshatin Mëzez, ku u ndalua automjeti tip “Audi” që drejtohej nga i arrestuari. Gjatë kontrollit të ushtruar në mjet, efektivët gjetën një qese me rreth 100 gramë lëndë të dyshuar narkotike kokainë, e cila, sipas hetimeve paraprake, ishte përgatitur për t'u shitur.
Në cilësinë e provës materiale, policia sekuestroi lëndën narkotike dhe automjetin. Materialet procedurale i janë referuar Prokurorisë së Tiranës për veprime të mëtejshme hetimore. Operacioni është pjesë e aksioneve të vazhdueshme të policisë për goditjen e shpërndarjes së drogave të forta në zona të ndryshme të kryeqytetit.