Shërbimet e Seksionit për Hetimin e Narkotikëve të Policisë së Tiranës zhvilluan të shtunën, më 17 janar 2026, operacionin e koduar Cargo 1, në vijim të veprimtarive proaktive kundër trafikut të drogës, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Si rezultat, u arrestua në flagrancë shtetasi Ervin Kaftiraj (E. K.), 45 vjeç, banues në Tiranë. Ai u lokalizua në një parkim, në afërsi të Rrethrrotullimit të Tegut. Gjatë kontrollit fizik iu gjet një sasi lënde narkotike kokainë, që dyshohet se e posedonte me qëllim shitjen në sasi në zona të ndryshme të Tiranës. Sasia arrin 1 kg e 39.4 gramë.
Objektet e sekuestruara
Gjatë kontrollit të banesës së të arrestuarit u gjetën:
- 1 armë gjahu;
- 1 armë sportive.
Policia sekuestroi po ashtu:
- Lëndën narkotike;
- 1 motomjet;
- 1 aparat celular;
- Armët e gjetura.
Të gjitha u morën si provë materiale. Ervin Kaftiraj merret me qira makina luksoze dhe mjete retro, ndërsa policia e kishte në përgjim prej disa muajsh. Hetimet vazhdojnë për zbulimin e personave të tjerë të përfshirë.
Materialet procedurale i kaluan Prokurorisë për veprime të mëtejshme.